Myanmar ram Vice President-2 Pu Henry Van Thio nih tutan Chinram a tlawnnak ah lamsuul siseh, thanchonak pawl a zoh pin ah biapi in Lei-um Mirang vawlei sehzung kong zohfel aa tim, tiah Chin Ramkulh Cozah Chimphuannak Nawlngeitu sin in August 13 ah kan theih.
“Atu hi Tonzaang, Tedim a kal hnu August 13 zaan Falam ah a riak lai. August 14 ah Surbung Airport a zoh ta lai i Thantlang ah a lan te lai. Cun, Bungzung kiangkap siseh, a bik in Lei-um Mirang vawlei sehzung tuah ding kong kha biapi in a zoh lai. Upa khuallam hi fiang in chim awk a tha lo nain Hakha ah a riak lai. August 16 khi Nay Pyi Taw ah a kir than te lai,” tiah Chin Ramkulh Cozah Chimphuanak Nawlngeitu Sipin le Electric Minister Pu Soe Htet nih The Hakha Post ah a chim.
Hi kong ah Minister Pu Sui Thio nih, “Bungzung pawng Lei-um khua Mirang vawlei sehzung kong hi company tha mi he aa tong i a si lai. Cu kong cu biapi ah chia in tutan hi a rak tlun mi hi a si. Hi Mirang vawlei sehzung hi kan tuah khawh ahcun, Chinmi a bik in mino tampi rian an ngei lai. Kan paw a kan cawm khawh fawn lai,” tiah The Hakha Post ah a rak chim bal.
Tutan VP Pu Henry Van Thio Chinram a tlawn ah Ramkomh Minister Dr. Myo Thein Gyi, Deputy Minister a si mi hna; U Tin Myint, U Khin Maung Win le U Myint Kyaing, Permanent Secretary (ame-dan-adwin-win) U Shwe Lay siseh, Director General le tuanvo ngeitu dangdang nih an zulh hna i, Chin Ramkulh Cozah le Hluttaw tuanvo ngeitu hna nih Kalaymyo tiang an va don pin ah a khuallam dongh tiang an zulh lai, tiah kan theih.
