Myanmar ram Vice President-2 Pu Henry Van Thio bawmhnak in Thantlang khua ah ceertual thar an cawh cuahmah, tiah thawng kan theih.
“Atu i vawlei a cotu seh pawl hi Sakremhnak Zung nih ngeih mi seh pawl an si i Pu Henry Van Thio nih a kan chimhpiak mi a si,” tiah Thantlang khua Sipin Committee Pu Obed Nawl Ceu nih The Hakha Post ah a chim.
Thantlang khua ceertual thar cawhnak hmun cu Khuahlun, BEHS No. 2 chak, Hangbo tlang ah a si i pumpululh chuihnak cu vawlei cung huap in hman mi ceertual a kauh (International Football Field Official Size) pe 360×240 a kau lai. Pumpululh chuihnak lawng siloin Tennis tuknak hmun thum, motor 50 in 100 kar dirter khawhnak motor chiahnak hmun le tiliaunak hmun zong sakchih a si lai, tiah kan theih.
“Pumpululh chuihnak hi cu tu kum chung ah lim ding a si. Tennis tuknak tu hi tu kum tangka kum ah cun aa tel lo. Hi ceertual thar cawhnak hmun hi Pu Henry Van Thio nih a zoh i a lungtlin ngainak hmun a si,” tiah Pu Obed nih a chimchap.
Hi ceertual thar cawhnak hmun pawng ah Zaangleknak Inn zong tangka Kyats sing 6000 dih in an sak cuahmah i Myanmar ram Vice President-2 Pu Henry Van Thio nih bawmh mi thiamthiam a si, tiah kan theih.
Hi Ceertual le Zaangleknak Inn cu tuan cuahmah a si. September 30 hlan lim ding an si. Ceertual cu June dih hlan ah aa lim cang lai. Tennis tuknak tu hi 2020-2021 tangka kum ah tuah ding mi a si, tiah Thantlang Sipin Committee Chairman Pu Ram Khar nih a Facebook Timeline ah a tial. ###
