Vice President 2 nih Hakha hmun ngei lo 1000 leng honpiak ding ca kuat hna

Myanmar ram Vice President 2 Pu Henry Van Thio nih Chin Ramkulh Hluttaw Chairman sin ah Hakha hmunthar acre 500, hmun 1000 leng cu 2018 kum chung ah hmun ngei lo mi pek dih ding le thanchonak rian faak deuh in tuan ding cu March 1 ah ca a kuat.
“Hi ca a kan kuat mi chung ah Chin Ramkulh Khualipi Hakha hi khualipi he aa tlak ding in thanchoter ding, hmun ngei lo mi le khuate lei in rat a duh mi zong hmun pek dih khawh ding cu 2018 kum hrimhrim ah hmun 1000 leng nan honpiak hna lai. Atu tiang ah inn hmun ngei lo tampi an um rih mi zong hi tha tein min cazin laak i pek khawh i zuam u,” tiah ca a kuat hna.
Hi kong he pehtlai in Chin Ramkulh Hluttaw Chairman Pu Zo Bawi nih, “Vice President 2 Pu Henry Van Thio nih ca a kan kuat i a kan fial ning in hmunthar zong cawh kan thawkcolh ko lai. Chin Ramkulh Cozah le Khuanu Khuapa he zong tonnak kan ngei lai i a ran khawh chung in tuanchuah kan i zuam lai,” tiah a chim ve.
Vice President 2 Pu Henry Van Thio nih Hakha a tlun lio ah hmun le a dangdang thanchonak riantuan a herh mi pawl chekhlatnak a tuah mi chung in ca a kuat mi hna a si tiah thawng kan theih.