Myanmar ram Vice President 2 Pu Henry Van Thio nih Laikua (Laiva Dam) cu a thar in acre 60 dil than i Hakha khua dinti ca ah hman ding in nan rak tuah lai, tiah Chin Ramkulh Cozah sin ah a forhfial hna, tiah March 1 ah kan theih.
“Hi kong hi Vice President 2 nih ca a kan kuat i Chief Minister Salai Pu Lian Luai le Khuanu Khuapa zong Zung khar a si ca ah ka chim manh hna lo. Budget zong kan suaisam cang i thla ruk hnu ah pehzulh in rian kan tuanchuah cang lai. Atu dil cia mi Laiva tidil khi Falam ca ah hman a si lai i a thar in acre 60 kau dil than mi cu Hakha ca ah a si lai,” tiah Chin Ramkulh Hluttaw Chairman Pu Zo Bawi nih The Hakha Post ah a chim.
Falam ca ah dilcia mi Laiva dam cu ti pipe zong a phan cang nain tlamtlinlonak tete a um ruang ah rian an thawk mi pehzulh khawh a si lo. Ti pipe zong a tha bak mi in hman le tuah a si lai, tiah kan theih.
