Kachin ram, Hpakant peng, KIA Brigade-9 hmun ah ralhraang vanlawng pathum nih bomb an thlak hna caah hma a pu mi rammi 100 leng cu sii i thlop kho lo ding in Ginsi khua chuah Gate ah Council ralhraang nih an kham hna tiah Kachin News Group nih a tial.
Ocotber 23, KIA Brigade-9 hmun, A Nang Pa hmun ah KIO an dirh kum 62 tlinnak Ni don hlasaknak an tuah i ralhraang Jet Fighter pathum nih bomb a thlak hna ca ah 50 leng an thi i 100 leng hma an pu. Hma a pu mi hna cu Hpakant le Myitkhina sii-inn pawl ah thlop an timh hna nain Council ralkap pawl nih Ginsi khua in an kham hna tiah KNG nih a tial.
“Hma a pu mi pawl kan chuah kho rih hna lo. Hika lei mi bawmchantu phu pawl nih an va ton hna nain an luhter hna lo. A ngah hnga maw tiah mizaw phor motor pawl an va kal nain an dihlak in Ginsi in an rak kir than. An kan honh ahcun, kal ding in mi bawmchuantu phu pawl timh cia in an hngak ko,” tiah chun hnu suimilaam 1:30 hrawng ah an chim.
Atu ah Ginsi Gate ah hma pu mizaw pawl chuahnak nawl pe lo in an hren hna leng ah, Brigade-9 hmun chung ah siibawi le sii-ai pawl lut kho lo in ralhraang nih an kham tiah theih a si.
Mi bawmchantu phu motor pawl, siibawi pawl nih Hpakant khua chuah zawn lawng in an hngah hna tiah thieh a si.
“Atu tiang cu an va chawnh hna lio lawng a si rih. A ngah lai le ngah lai lo hngalh a si rih lo. A ngah ahcun motor pawl chuah ding in timh cia an si,” tiah tualchung mi pakhat nih a chim.
Atu ah cun Council ralhraang nih Sankway hlei le Pantin Hlai in mi an check i ralkap thazaang zong an chap tiah theih a si.
Ref: Kachin News Group
Photo: KNG
