Zei media le zei media nih dek kan konglam an tial than rua, Chin Ramkulh Peng kip in EC hmanh nih Palai aa cuh ding mi kan fehter rih hna lo, tiah Chin Ramkulh USDP Chairman le atulio Huttaw Palai Dr. Hmuh Thang nih June 23 ah a chim.
Hi kong hi USDP nih June 22 ah online conference an tuah i Palai kong cu an ceih ko nain, cheukhat Peng hoi cu online hmang kho loin conference hmanh ah an i tel lo, tiah kan theih.
“Keimah hoi hna kha Pyithu Hluttaw Palai in aa cuh lai, tiah an ka taar. Zeitinhme kan si tawn. Kanmah tuanvo ngeitu hmurka in a chuak mi thil zong a si lo. Social Media theo ah kan lang hoi. A ngaingai cu, July thla chung lawnglawng ah kan i fiang lai. Atu hi Palai aa cuh ding ahran cu kan chuahpi pah cio ko hna. Asinain, June 22 kan meeting hoi ahcun Paletwa, Mindat le Thantlang lebang cu online conference ah an mui hmanh an lang kho lo i an aw hmanh kan thei kho lo. Aho an chuahpi zong kan hngal lo. Cun, Chin Ramkulh Peng kip ah khual kan tlawng rih lai. Ahran kan chuahpi mi hna kha Peng kip meethlatu nih an thim rih hna lai. Cu hnu ah, Baho ti mi Central Executive Committee (CEC) sin ah a phan rih lai. Peng kip nih Palai kan taar mi hna kha CEC he kan i ceih rih lai i cu hnu July thla chung ah a fiang te lai,” tiah Dr. Hmuh Thang nih The Hakha Post ah a chim.
Atulio Social Media ti mi Facebook cahmai ah Thantlang Peng in USDP Palai aa cuh ding tiin an taar mi hna cu; Pyithu Palai ah Dr. Hmuh Thang, Amyotha Palai in Pu Zo Peng, Ramkulh (Pyine) No. 1 ah Pu Van Ni le Ramkulh No. 2 in Pu Siang Lian Hmung an si lai, tiin thawngpang a leng mi kong ah atu bantuk in tuanvo ngei bik a si mi Dr. Hmuh Thang nih The Hakha Post ah a fianter hi a si.
