2020 ram pumpi thimnak ah Union Solidarity and Development Party (USDP) nih cozah a ser khawh a si ahcun lothlo bu minister zung pakhat chap an timh tiah theih a si. Hi lothlo bu minister zung chap ding kongah Chin ramkulh USDP chairman Dr. Hmuh Thang nih a tanglei bantuk in a chim.
“USDP nih 2020 thimnak ah teinak kan hmuh i, cozah kan ser khawh a si ahcun Lothlo bu minister zung pakhat kan chap lai. A ruang cu, kawlram chung kan zoh tikah a tam deuh cu lothlo hi an si. Cuti milu tam deuh a simi lothlo hna a dirpitu si ding kan duh. An herhnak ah tawlrelpitu le dirkamhtu si kan izuam lai. A tawinak in chim ahcun lothlo hna an kongkai ah tawlrelpitu si ding hi kan hmuitinh cu a si ko” tiah Dr. Hmuh Thang nih The Hakha Post ah a chim.
Cun NLD cozah nih biaknak lei zung a chap mi cungah hitin a hmuhnak a chim. “Biaknak lei tawlreltu zung a si bantuk in zei bantuk biaknak sin zongah tlukruannak um dingin rian a tuan a hau” tiah a chim.
Dr. Hmuh Thang hi 2020 thimnak ah USDP aiawh in Thantlang peng, Ramkulh Hluttaw No 2 ah aa zuam ding a si. Cun, 2010 kum thimnak ah aa rak izuam nain, a sung i, 2015 kum thimnak ah teinak a rak hmu.
