Chinmi minung 24000 leng an umnak USA ram Indianapolis state chung lawng ah kanmah Chinmi chung in COVID-19 zawtnak hrik ngei minung 300 hrawng an um i, minung 80 leng nih zawtnak in damnak an hmu than tiah Chin Community Center Manager Pu Moses T Lian sin in kan theih.
Pu Moses T Lian nih, “Kanmah hi Indianapolis ah a ummi kan si. USA ram Indianapolis state ahhin kanmah Chinmi minung 24000 hrawng kan um. Minung 24000 hrawng chung ah Chinmi minung 300 hrawng nih COVID-19 zawtnak hrik nih a kan phak ve. Cun, kanmah lei nih thawngpang kan theih ning ahcun zawtnak hrik ngei minung 300 hrawng chung ah minung 80 hrawng nih damnak an hmu than. Zawtnak hrik a ngei mi ah kum 25 in kum 40 kar hi an tam bik,” tiah The Hakha Post ah a chim.
2020 April 25 suimilaam 6:00PM tiang vawlei pumpi huap COVID-19 in a thi mi minung 197,162, zawtnak hrik ngei minung 2,811,891, zawtnak in a dam than mi minung 793,838 an si. Vawleicung ram huap ah zawtnak hrik ngei minung 905,333 in USA a tam cem ah an dir i, USA lawng ah a thi mi minung 519,49 an si cang tiah Johns Hopskin nih a langhter.
“Atu lio kan ton cuahmah mi COVID-19 zawtnak hi tihnung ngaimi zawtnak a si ca ah laitlang lei zong rak i ralring ko uh. A bik in Cozah nih nawl leng chuah lo ding in nawl a chuah mi ti bantuk pawl zong zulh khawh rak i zuam hram ko uh. Biakinn chung theng i i pumh lawng hi Pathain nih a theih mi a si loin khawika hmun poh ah Pathain thangthat le Pathian he i chawnhbiak hi rak tlot hrimhrim hlah uh,” tiah Pu Moses T Lian nih a chimchap.
2020 April 25 suimilaam 7:00AM tiang ah Myanmar ram Ngandamnak le Zaanglek Zung nih Myanmar ram COVID-19 zawtnak hrik ngei minung 146 an si cang. Minung 10 nih damnak an hmu than i, zawtnak in minung 5 an nunnak a liam tiah a thanh.
