Myanmar ram ah Federal Democracy uk phung a chuah khawh nakding aa zuam cuahmah i K3C he March 28 ah tonnak kan ngei tiah US Ramleng vuanci zung ruahnak petu Counselor Darek Chollet nih a Twitter cahmai ah a ṭial.
K3C ti mi cu Kachin, Karen, Karenni le Chin miphun hriamtlai phu hna KIA, KNU, KNPP le CNF hi a tawinak in auhnak a si.
Counselor Darek Chollet nih, “Myanmar rammi hna caah a him mi le a ṭha mi hmailei sersiam nakding ah ramdang bawmhnak zeitindah kan karhter khawh lai ti mi kongkau kan i ceih” tiah a ṭial.
Shan ramkulh Chaklei ah Unau Thum Phu nih kahdohnak ah teinak an hmuh bantuk in, K3C tiah auh mi Kachin, Karen, Karenni le Chinram zong ah tlangcung hriamtlai phu hna nih teinak tampi an hmuh i, SAC ralkap camp tampi an laak khawh cang, tiah theih a si.
