America ram a voi 46 nak President thar President Joe Biden nih Bible chiatserh biakamnak a tuah dih tlawmpal ah President Joe Biden nih President hlun Donald Trump i a phunglam hna cu hnon in thlennak tuah hram a thok colh tiah theih a si.
President hlun Donald Trump nih COVID-19 zawtnak a tawlrel ning phung, pawngkam thilri zohkhenh ning phung le social warfare phunglam hna cu hrawk in a der ngai cang mi US chawlehthalnak a lu tung than kho ding le ram chung ah ithencheunak tete a chuak mi thil vial te hna siamremh than nakding in President Joe Biden nih rian a ot cang tiah theih a si.
President rian thok nakding ah tuah zungzal mi phung Bible chiatserh biakamnak tuah aa lim in phunglam thanhnak le lomhnak te hna chimnak a ngei i, tuah ding mi thanhnak biatlang 17 chimnak a ngei i, US president inn-rang pi chung ummi arti-pungsan in a zol mi president zung-inn chung ah President Joe Biden nih minthutnak a tuah tiah theih a si.
President thar Joe Biden nih minthutnak a ngeih mi chung in aa tel mi ahcun Muslim ralzam hna le Africa ram cheukhat hna in America ram chung ah luhnak nawl phihkharnak President hlun Donald Trump nih a tuah mi phung hna kha thihter in phung thar ser ding hna aa tel tiah kan theih.
President Joe Biden nih “Tu khuasik thla chung zong ahhin harnak tete a um len ko lai. Nain, phundang tete in thatnak tete zong an um len ve ko lai” tiah Bile tlaih biakam chiatserhnak a tuah lio biahcimnak ahcun a chimchap.
Cun “Siamremh ding zong tampi a um i, sunghzatlaknak a rak um mi vialte hna zong sersiam than an herh i, dam lak in thlawp a herh mi hma zong an um hna i teinak lianpi ser ding ah tuan ding tampi an um” tiah President Joe Biden nih a biachimnak ahcun a telh chih tiah kan theih.
Cupin ah a chimchap mi cu “Pakhat le pakhat hi ral zoh in izoh hram hlah u. Innpa bantuk in khat le khat izoh u. Irualrem tein um hram u. Thinhannak he aukhuannak tuah hrim hlah u” tiah forhfialnak bia a chim chih tiah theih a si.
Joe Biden phung hna ahcun mask ihuh peng ding le vawlei ngandamnak zung (WHO) he pehtlaihnak President hlun Donald Trump nih a rak phih mi vialte phung hna kha sersiam than ding zong an itel chih. (Ref: New York Times)
