US Embassy bawmhnak in tuah mi English Access Micro-Scholarship Program in minung 42 degree an la lai Hakha ah US Embassy bawmhnak in tuah mi English Access Micro Scholarship Program in minung 42 nih 2020 February 8, CCU Chapel ah Degree an la lai, tiah kan theih. “Kan kai mi hi English Access Micro Scholarship Program ti a si. Kan cawn mi Subject pawl cu Pathway 1 & 2, English Grammar, US Culture and Customs (nunpung le nunkhuai) an si. US Embassy nih a dihlak in bawmnak a pek mi program a si. Cultural Affairs Office tang ah a um a si. Cun, Hakha hrambunh mi Chin Christian University (CCU) he tuan ti mi a si.
Hakha, Program Director cu Hta Cin Sung (Lecturer, English Department) ka si. Program hi kum 2 a si. Sianghngakchia 50 rak thim a si i, 40 hi cohlan an si. Minung 10 tucu observer in lak an si. Asinain, 42 lawng certificates pek an si lai. Cun, Graduation ah hin, US Embassy lei in Nathanael Howard Information Support Team Leader le Tyler Landis Information Support Team, Assistant Team Leader an i tel lai,” tiah Program Director Sayama Hta Cin Sung nih The Hakha Post ah a chim.
.
“Access cu cacawn lawng si loin Community service pawl hi papek in tuah chih a si. Enhancement activities thawng in anmah pumpak le pawngkam ca ah thathnemnak tampi a chuak. Cun, Personal Development (pumpak thanchonak) hi papek in an chiah i, an herh mi thil tampi cawn chih a si. US nunphung tampi an cawn tik ah kanmah lei nunphung he tahchunh in ruahnak tampi a kauhter. “We are Access, We are One” kan i ti i, US Government i Education program ah State Alumni an si cang,” tiah Sayama Hta Cin Sung nih a chimchap. Hi Program hi 2017 December thla in 2019 September tiang a si. A kai mi hi, GTI in 18, CCU in 17 le Hakha University in 15 an si. Kum rikhiah a si i, kum 16-19 karlak cohlan a si. Tanghra awng poh nih sok khawh a si, tiah kan theih
