US ram ah a ummi Chin miphun hna sin ah tlawnkai ding in Mizoram Chief Minister Pu Lalduhoma cu nihin August 30 ah Aizawl in aa thawh cang, tiah theih a si.
September 2 ah Maryland ah an tuah dingmi Mizo Day ah Pu Lalduhoma cu khuallian ah sawm a si i, Washington D.C. i acozah upa hna he zong tonnak a ngei te lai, tiah Mizoram thawngzamhnak hna nih an langhter.
Cun, September 4 ah Indiana ah a ummi Chinmi hna he zong tonnak an ngei te lai, tiah Chin Community of Indiana (CCI) nih a rak thanh.
US ram ah Pu Lalduhoma a tlawn dingmi cu India ramleng vuanci zung zong nih a theihpimi a si i, US ram a phak tik zong ah Consulate General of India ṭuanvo ngeitu hna nih an vung don te lai.
Aluancia July 25 ah khan ralzaam bawmtu NUA le Mizoram Chief Minister cu biarauhnak an rak ngei i cu lio ah cun Chin miphun lungrualnak le funtomnak kong he pehtlai in US ram ah Pu Lalduhoma tlawn ding in khuakhannak an rak ngei, tiah theih a si.
