Chin miphun karlak remdaihnak kong he pehtlai in nizaan July 3 ah US ah Chin-Mizo biaknak le zatlang lei upa hna ton biaruahnak an ngei, tiah theih a si.
Hi ton biaruahnak ah hin CBCUSA, Baptist Church of Mizoram (BCM), Chin Baptist Association of North America (CBANA), Zomi Baptist Church of America (ZBCA), Mizo Zirlai Pawl (MZP) le Central Young Mizo Association (CYMA) in aiawhtu hna an in tel.
“Atu zaanlei cu CBCUSA office ah Mizoram in a ra mi, BCM Administrative officer hohatnak in CBANA, ZBCA, MZP le CYMA hruaitu hna he ton biaruahnak kan ngei. Nanmah nih kan host ko u, an ti caah lunglawm tein kan don hna,” tiah CBCUSA nih an Facebook cahmai ah an langhter.
Hi ton biaruahnak ah hin Chin miphun karlak ah remdaihnak le funtomnak a herhnak kong biaruahnak ngeih a si i, biachahnak ngaingai an tua lo nain hmailei remdaih biaruahnak caah a hramthawknak a si, taih CBCUSA nih a langhter chap.
Atutan ton biaruahnak hi BCM hohatnak in tuah mi a si i, CBCUSA nih inntek tuanvo a laak, taih kan theih.
Photo: CBC USA
