Hakha khua ah Chin Ramkulh Cozah nih hmun thar a samh mi acre 676 chung ah upadi lonh in inn a sa mi pawl cu Sipin upadi ning in thehpiak ding thawngthanhnak cu July 15, Hakha Zungkipfonh Zung, Meeting Room ah an tuah.
Upadi lonh in inn a si mi pawl inn thehppiak ding kong thawngthanh a si i zarh khat chung ah nanmah tein thet dih u, ti a si nain inn sa leikam in kan theh kho lo, tiah bailehnak an tuah ve.
Hakha Peng Sipin Lutlai Pu Tam Aung Shing nih, “Aho poh khuapi um cu kan duh cio. Asinain, phungning te tu in um le inn sak hi a tha deuh lo maw. Kei zong Khrihfa ka si, Chinmi ka si ve. Hi inn nan sak mi hi nan ei ding hmanh ei lo le, nan din ding hmanh ding lo tein nan i khon mi tangka in nan sak mi a si, ti hi ka hngalh. Cu bantuk cu zeitin dah minung ka si ve i theh cu ka duh ve lai. Inn thehpiak hi ka duh hrimrhim lo. Nihin nan rat tik zong ah lung nuam tein nan ra lo, thinhun bu, lungfah bu in nan ra ti mi hi ka hngalh. Kei zong ka lung nuam lo, ka ngaichia ve, ka lung zong a fak ve. Harsa ngai in sak mi, mi inn va thehpiak cu ahodah a duh lai. Asinain, hman lio mi upadi ning in rian khinh ka si ca ah ka al kho lo. Cucaah, thehpiak thiamthiam nan hau lai. Kanmah nih thehpiak i thehnak man zong liam nakin, nanmah tein thet ulaw, inn nan theh mi kha hman thla u. Cu hnu ah cozah sin ah, inn hmun na ngeihnak sullam, na cawknak sullam, inn na saknak sullam le a ruang vialte kha chim u, tial u. Cu ti cun ka hmunte hi keimah kut ah phakter than ka duh ti ulaw, cucu a tha deuh lo maw. Nihin nan rat mi hi i ceihmai awk ah a si lo. A ceihhmaipitu zong kan si lo. Inn theh ding a si cang mi kha thawng kan thanh bia hna a si i kanmah nih theh nakin nanmah tein theh ulaw a tha deuh, tiah kan nawl bia tu hna a si,” tiah a chim.
Inn theh ding mi kong ah inn satu hna nih, “Hmun nan samh i hmun ngei pawl ceihmaipinak zong um loin ruru hranghrang in kan hmun, kan vawlei vialte na hrawh, nan cawh dih. Cozah Zung zong ah ca kan tial, kan i zuam ve nain zeihmanh lehnak a um ve lo tik ah, kan vawlei le kan hmun sungh kan duh ve lo ca ah kan sak mi a si. Inn cu kan thet kho hrimhrim lo. Inn thehpiak lo tein lam dang a um lo maw. Nan thil tuah mi hi, ziah ralkap bantuk in pei ruru hranghrang in nan kan tuahto hi. Hro le cer kan herh tung lo, mifir maw kan si, misual maw kan si. A hlankan tein kan ceihmai hmasa u law, hi thil hi a chuak hrimrhim lai lo. Inn theh hau loin lam dang nan kan kawlpiak kho lo maw,” ti hi inn satu hna awka a si.
Hi kong ah Pu Tam Aung Shing nih, “Lam dang a um ti lo. Upadi pin in lam dang a um ti lo. Cucaah, nihin bantuk in thawng kan thanh i nanmah tein thet u kan tinak hi a si. Palek le Meithattu hna le tank in kan theh ah cun inn kha a rawk lai i thilri laak awk zong a tha ti lai lo. Anmah tein an theh ahcun inn thing pawl zong tha tein an fimtawl khawh lai,” tiah a chimchap.
Innsatu hna lei in, “Voi tampi ca kan tial ve, kan chim ve nain rammi nih thim mi Cozah nih rammi kan duhnak a zulh lo ca ah hnu pil kan i tim ve ti lo. A chuak poh chuak cang ko seh. Kan phaknak poh kan phan cang ko lai,” tiah awka an langhter ve.
“Nihin kan i ton mi hi i ceihmai a si lo. Thawngthanh a si. Kanmah tein kan theh lai nan ti a si ahcun nanmah nawl, kan thet kho lo, nan ti zong ah nanmah nawl thiam a si ko. Upadi nih rian a kan khinh bantuk in kan tuan ve ko lai,” tiah Pu Tam Aung Shing nih bia a leh ve.
Hi hmunthar samh mi acre 676 hi hmun pek a si hlan le lam cawh a si hlan ah hlanlio tein dum le hau a rak tuan cang i inn aa rak i sa mi hi inn pariat lawng a si. Lam cawh hnu in nihin ahcun inn 130 leng a si cang, tiah Sipin lei tuanvo ngeitu nih an chim. Asinain, hi kong ah inn innsatu le rammi cheukhat sin in, “Lam chunh hlan inn riat lawng nan ti mi hi a dik lo. Kannih zong kan um ve cang, lam cawh hlanpi in kan um ve cang,” tiah a chim mi an um ve.
