UFC nih Joshua Van cu Myanmar thantar i put ding in nawl a honh cang caah aralai mi UFC ṭhuat zuamnak ah Joshua Van nih Myanmar thantar aa put cang lai, tiah theih a si.
Joshua Van nih, “Nizaan ah khan email an ka kuat i ka lawm tuk hringhran. Ka ram thantar i ken ding in nawl honh ka si cang tiah ka hawile le ṭhuat cawnpiaktu pawl ka hmuhsak hna. Ka ca ah cun ni suanglawi taktak a si ko,” tiah Media ah a chim.
Myanmar hi ram pakhat a si tiah UFC nih a rak theihfian taktak lo caah hi hlan ah hin Myanmar thantar i put an honh lonak a si kho tiah Joshua Van nih a chim.
“A voi khatnak ka ṭhuat lio ah khan ahohmanh anmahle ram thantar i put an honh hna lo. Cucu theihthiam a si ko. Voi 2nak le voi 3nak ka ṭhuat lai ah thantar i ken ding in ka hal ṭhan hna nain Myanmar hi ram pakhat a si le si lo zong an thei lo. Cuticun an ka chimh ning cu a si. Google ka kau i Myanmar cu ram pakhat a sinak kong ka hmuhsak hna. Cun, a donghnak bik ka ṭhuat lio i Myanmar thantar aa suai mi Mouth Guard ka hman mi zong nih khan lai a rel ngai,” tiah Joshua Van nih a chim.
March 8 ah an tuah ding mi UFC 313 ah Joshua Van cu Rei Tsuruya he i ṭhua ding in timhtuah a si i, hi ṭhuat zuamnak ah hin Joshua Van nih Myanmar thantar i ken ding in timhtuahnak a ngei.
Joshua Van pumpak nih, “March 8 ah Myanmar thantar cu UFC Octagon cung ah luhpi a si cang lai,” tiah February 27 ah a Facebook cahmai ah a ṭial.
