Hnin-si Party tiah auh mi United Democratic Party i Myanmar ram Lutlai a si mi Zahkhung Zung Sau & U Kyaw Myint cu thonginn in a zaam mi a si tiah 2020 September 30 an tlaih ko nain Chin Ramkulh chung um UDP party cu ngol an i tim lo tiah thawng kan theih.
Tlaih a tong mi U Kyaw Myint hi Yangon nitlaklei pengkomh chung a ummi Hlaingtaayar khuapi chung Panhlaing inn ah a ummi a si tiah theih a si.
Atu bantuk in an tlaih mi kong he pehtlai in, a umnak sang rian ngei upa pakhat nih, “Zaan suimilaam 10:00 tluk ah an tlaih. U Kyaw Myint hi Mandalay Oobu thawnginn in a zaam mi a si tiah thawng theih asinain a dik le dik lo cu aa fiang rih lo,” tiah The Voice Media sin ah a chim.
Tlaih a tong mi U Kyaw Myint i party UDP hi atu Myanmar ram Cozah a tlai lio mi NLD party chang ah Hluttaw Palai a ngei tam cemmi party an si tiah kan theih. U Kyaw Myint hi thonginn in a zaam mi le Tuluk rammi sinak card i tlaih in Canada ram khuasak le lamli khomi a si tiah theih a si.
Party Lutlai U Kyaw Myint cu tlaih le taza cuai a tong ko nain Chin Ramkulh chung i UDP party hna cu ngol loin hmai kan nor chin rih ko lai tiah Hakha Peng Ramkulh Hluttaw No.2 in aa zuam ding Pu Ram Peng sin in thawng kan theih.
Pu Ram Peng nih, “Kan pu hi tlai hna hmanh sehlaw a poi kan ti lo. Hi party hi U Kyaw Myint lawng nih dirhmi si loin, minung 150 nih dirhmi a si. Party zong a rawk lai lo. Meepek sawmnak zong atu hi kan kal cuahmah ko. Kei hoi hna cu Senthang Peng ah aa zuam ding ka si i, mizapi nih an ka dirpi ngaingai. Teinak zong ka hmu ko lai ti zumhnak ka ngei,” tiah The Hakha Post ah a chim.
2020 kum Myanmar ram party tling Democracy thimnak ca ah UDP party in Hluttaw thudan 39 chung ah hmun 38 an i zuam lai. Cun, UDP party hi tutan thimnak Chin Ramkulh chung ah NLD party dih in a tam cem a pahnihnak an si tiah Chin Ramkulh, Thimnak Zung lei in theih a si.
