Thantlang Youth Association (TYA) le Thantlang Sianghleirun Siangakchia hna i bawm in Thantlang khua pawngkam a hninhno nakhnga khualuhnak hauka pawng ah thingkung an cin, tiah kan theih.
Hi kong ah TYA in Salai Min Lian Thang nih, “Thantlang khua luhnak hauka a hninhno khawh nakhnga tiah Cherry kung 35 far kung 10 a dihlak ah kung 45 kan cin. Thingkung cin hi pawngkam dawhnak ca ah siseh, pawngkam a hninhno nakhnga siseh, pawngkam runvennak zong ah a biapi bik mi a si. Thingkung nih hin minung ca ah thatnak tampi a chuahpi. Cherry hi Thantlang khua hmelchunhnak a si i, Cherry khuapi a si khawh nakding, Thantlang khua a hninhno nakhnga le aa dawh mi khuapi a si khawh nakhnga timi ruahchannak he kan cin mi a si,” tiah a chim.
Hi thingkung an cin mi hi, Thantlang Peng Thingram Zung nih an pek mi hna si i, TYA le Thantlang Sianghleirun Siangakchia hna nih kumfatin thingkung cinnak an ngei peng. Cun, an cin mi thingkung pawl zong a nun khawh nakhnga tha tein an zohkhen peng, tiah kan theih.
“Hi thingkung cinnak hi Thantlang Youth Association hruainak in tuah mi a si. Kanmah Thantlang Sianghleirun Siangakchia zong an kan sawm ve ca ah kan telpi hna,” tiah Thantlang Sianghleirun Siangakchia hruaitu Salai Tial Sang nih The Hakha Post ah a chim.
Hakha University Students Organization zong nih 2020 July 1 ah thingkung cinnak an ngei ve lai, tiah kan theih.
