Tukum thaal nilin cu kum dang nakin a fah ca ah Thantlang ah ti a har i motor nih Lahva ti a than i company riantuantu pawl nih an cawk hna.
“Tukum Thantlang cu kum dang nakin a linh ca ah ti kan har ngaingai. A bik in company inn sa mi pawl le dinti thiang a zuar mi hna cu motor nih Lahva ti a than mi kan cawk,” tiah Bethsaida dinti thiang a zuarmi Pu Van Bawi Lian nih The Hakha Post ah a chim.
“Kambawza Alyintan company nih Thantlang khua ca ah motor pahnih nikum hmasa ah an rak kan cawkpiak mi hi um hlah sehlaw kan har ngaingai lai. Hi ti an zuar mi hi khuami zapi ca ah si lo in company le dinti thiang a zuar mi nih cah le cawk an si. Dinti thiang a zuar mi hi kan har khun, zeicatiah cawk chom in kan zuar tik ah tukum cu kan sung ngai,” tiah a cunglei upa nih a chimchap.
Hi motor hi Sipin nih a tawlrel mi a si i an hmuh mi tangka cu hi motor a riantuannak le a herh mi tawlrelnak fund ca ah an hman, a miak kawlnak ca ah a si lo tiah kan theih.
Khuapi nih cu hlan hman mi ti kha kan i zaat ti lo ca ah ni khat ah tangki cheu cio tluk hrawng kan ting i thilsuk ding tamdeuh a ngei mi cu Lahva ah suk a si. “Lahva ah thilsu an tam ca ah ti a nawi tawn i motor nih zing thilsu an um hlan ah a than tawn. Atu cu chaklei Thlualam lam kai tivate pakhat seh in an dil i cucu an kan thanpiak i a thiang ngaingai,” tiah a cunglei upa nih nih a chim.
Ti a har khunnak hi thlanglei hmunthar sang an si. No.1 Highschool hna cu Sipin nih a lak in an pek pah hna. Thantlang khuapi ti duhdim tein hman khawh nakding ah ti in Vice President Pu Henry Van Thio bawmhnak in Khualhring tlang Hrianghnang khualu ti an laak mi zong kumvui lei ah cun a chuak cang lai tiah khuami nih an zumh.###
