Tukum Russia ah tuah ding mi World Cup ah GFA-FC in Rev. NC Thawng Tha Thang a kal

2018 kum Russia ah tuah ding mi World Cup pumpululh celh zuamnak ah Myanmar ram in GFA-FC President le Believers Church GS Rev. NC Thawng Tha Thang cu June 12 ah aa thawh cang, tiah kan theih.
“Hihi Myanmar Football Federation (MFF) hruainak in kan kal mi a si. Myanmar ram in Pumpululh Celhphu a ngei mi hna le tuanvo ngeitu cheukhat kha thim in kan kal. Hihi FIFA tawlreltu hna nih vawlei cung ram kip Football Club ngei mi kha ai-awhtu dirhmun in an kan sawm mi a si,” tiah Rev. NC Thawng Tha Thang nih The Hakha Post ah a chim.
Tukum World Cup ah MFF President U Zaw Zaw, U Pyi Phyo Teya, Yathanapone FC ngeitu, Zwekapin FC ngeitu, Fitlaw Pho Chit, Sagaing United FC ngeitu, le U Soe Moe (MFF CEO) tibantuk hna le mi dangdang hna he Myanmar ram in minung 11 an kal.
Rev. NC Thawng Tha Thang cu Myanmar ram ai-awh, GFA-FC ai-awh le Chinmi lak in a pakhatnak World Cup va zohfel ding ah a kal hmasa bik mi a si, tiah kan theih.