Tukum Hakha Lai Kum Thar Tho cu Hakha Khuanu Khuapa nih CACC Nunphung le Zaatlang Phu sin ah tuanvo an pek hna i Live Show in October 31 ah an tuah lai, tiah tuanvo ngeitu sin in September 29 ah kan theih.
“Live Show in tuah kan i timh mi hi COVID-19 phihkharnak ruang ah a si ko. A ngaingai cu tukum hi Hnaring khua ah tuah kan i tim nain anmah zong nih an tih i kanmah zong nih ralrin a hau ti kan hngalh ca ah CACC Zung tu ah Live Show in kan tuah lai. Program zong tampi kan suaisam lem lo. A ruang cu live a si lai ca ah sau zong an zoh zuam lai lo kan ti i program tampi kan suaisam lonak a si,” tiah CACC in tuanvo ngeitu le Tho tuah nakding hruaitu Dr. Khar Ling nih The Hakha Post ah a chim.
Lai Kum Thar Tho hi Falam nih cun Fang-er an ti, Tedim nih cun Khuado an ti. Thlanglei Laitlang nih Kumci tibantuk in sunglawi ngai in kumfatin an hman tawn cio mi a si nain COVID-19 phihkharnak ruang ah 2020 kum Lai Kum Thar Tho cu Cozah nih mibu umnak nawl a pek lo ca ah Hakha CACC Zung ah Live Show in an tuah lai, tiah kan theih.
