Lamkam ah sikaan ngei loin motor le motorcycle a dirter mi dantat an si cang lai
Chin Ramkulh ah motor le motorcycle ningcanglo le sikaan ngei lo in a dirter mi, a chia mi cu dantat an si cang lai, tiah Lamsuul Minister sin in June 19 ah kan theih.
“Motor le motorcycle hi lam kam taktak te ah khin chiah awk a si. Ningcanglo in lam a chunglei tuk ah a dirter mi cu tlaih an si cang lai. A bik in lam kawi hrimhrim ah dirter lo ding. A ruang cu accident hi a tam tuk i a zor deuh nakding ca ah kan ti mi a si,” tiah Chin Ramkulh Cozah Lamsuul Minister Pu Sui Thio nih The Hakha Post ah a chim.
2018 kum chung motorcycle accident in Hakha khuachung minung 28 an thi cang. Accident a tlawm nakhnga, motor le motorcycle khalh ning ralrin a herh i ningcang loin lam kam tuk ah motor le motorcycle a dirter mi cu tlaih thluahmah an si cang lai, tiah kan theih.
Chin Ramkulh Cozah riantuantu hna nih Golf tuknak ah thingkung 4000 leng an ciin
Chin Ramkulh Cozah riantuantu hna nih June 19 zing Golf tuknak ah thingkung 4120 hrawng an ciin tiah tuanvo ngeitu sin in June 19 ah kan theih.
“Hihi kokek harnak kan ton lo nakding le kan khuaram hninghno seh ti saduhthahnak he tuah mi a si. Ciinthlaknak le Zuatkhalhnak Zung thithruainak in tuah mi a si. Kan ciin mi kung 4000 hi chokhlei kung deuh lawngte a si. Khuaram i dawh seh, chokhlei nih Kohkun hi thuam sehlaw i dawh chinchin seh ti kan duh ca ah kan ciin mi a si,” tiah min langhter lo mi tuanvo ngeitu pakhat nih The Hakha Post ah a chim.
Chinram Hakha khua ah tlangmincimh a tlawm nakhnga Rungtlang ah siseh, Kohkun ah siseh, tlangmincimh tawnnak hmun hna ah thingkung a phunphun kung tampi an ciin cang, tiah kan theih.
Ruahpi a peh in a suur mi nih Chinram lamsuul zeimawzat a hrawh nain a him ko: Minister Pu Sui Thio
Fuurpi a si bantuk in tlangmincimh tibantuk cu a um ko lai, Chinram lamsuul tampi a rawk nain thinphan awk ngaingai a um lo, tiah Lamsuul Minister nih June 19 ah a chim.
“Atu hi Rezua in Matupi kar lam pe 100 renglo a cim i nihin tiang khualtlawn lamliitnak a tha lo. Asinain theng ready in kan chiah ko ca ah thinphang a si lo. Cun, Lailenpi lam meng 60 chung ah meng 20 hrawng cu kal awk a tha rih lo. Asinain, theng (JCB) ready in kan chiah peng ko ca ah lungretheih ding a um hrimhrim lo,” tiah Chin Ramkulh Cozah Lamsuul Minister Pu Sui Thio nih The Hakha Post ah a chim.
Tutan ruahpi a pehpeh in a suur mi nih Hniarlawn kataza lam pe 150 hrawng cu a cim dih. Saisihchuah lam, Hakha khuachung, Thantlang khuachung, Matupi khuachung le Hakha-Kalay lam le Hakha-Gangaw lam zong zeimawzat a rawk nain lungretheih ding le thinphang a si lo, tiah a cunglei Minister nih a chimchap.
