US President hlun Donald Trump meithal in kah a ton mi kong ah atulio US President Joe Biden zong hi Indirect in ṭuanvo a ngei, tiah Republican Pary nih sual a phawt.
Republican Party aiawh in 2024 US President zuamnak aa cuh mi Donald Trump cu July 13 ah Pennsylvenia ramkulh, Bulter khua ah thimfung lemsoi biachimnak a ngei i, cu lio ah cun Thomas Crooks ti mi pa nih meithal in a rak kah.
Meithal kahnak ruang ah Trump cu a orhlei hnakhaw cung ah hliamhma a pu i, Trump biachimnak ah aa tel mi minung pakhat zong a nunnak a liam. Meithal in a kaptu pa cu US ralkap nih thi lak in a hmun ah an kah khawh ve.
Democrat Party aiawh in 2024 US President thimnak ah aa cuh ṭhan mi atulio US President Biden nih “Atulio i abiapi bik rian cu Trump tei hi a si. Trump a tei khotu ding ah aa tlak bik mi cu keimah hi ka si ko. Cucaah, bia i el len a hau ti lo, Trump lawnglawng hi hmuitinh ah chiah a hau cang,” tiah a rak chim.
“Trump lawnglawng hi hmuitinh ah chiah a hau…” tiah Biden nih a chim ruang ah atu bantuk hin meithal in kah a ton mi a si tiah Republican nih Biden cu sual an phawt.
Kum 20 lawng a si mi Thomas Crooks nih Donald Trump thah ding in meithal in a kah mi kong he pehtlai in FBI nih hlathlainak an tuah cuahmah lio a si, tiah theih a si.
