Chinram Chaklei Tonzang khuapi ah eidin le thilri man a kai tuk i sii-ai cawk awk zong a cat tiah Khonumthung nih nihin September 24 ah a ṭial.
Chin ram lei ah facang le sii-ai kai kho lo in SAC ralkap nih Kalay University hmai Meng 8 Check Gate in an kham caah atu bantuk in sii-ai a cahnak le thil man faak tuk in a kainak a si tiah kan theih.
“Hman zungzal mi thi ṭum sii le datsa tibantuk pawl a dihnak a sau cang. Lufahsii le thli sii tibantuk zong a um tuk ti lo. Damlo caan ah harnak kan tong,” tiah khuami pakhat nih Khonumthung ah a chim.
Kalay in Chinram Chaklei ah thil phor motor an kai kho ko nain SAC nih facang le sii-ai phorh an kham. Tonzang khua ah arti pum khat ah Kyats 1000, chapiat hmui tlang khat ah Kyats 2500, Necia chiti pung khat ah Kyats 210000, Ayeyarmin kawchiat facang tun khat ah 200000 tiang a phan tiah theih a si.
Tonzang khua ah inn thong khat leng a um i minung thong riat deng khua an saknak khua a si. 2024 May 23 ah Chinland Cozah ralkap bu nih an rak laak i atu ah cun khuami cheu thum cheu hnih tluk an kir ṭhan cang tiah kan theih.
