Tonzaang SAC ralkap nih thihhlanlo thong an thlak mi CDF sayama le a dang thongtla pahnih cu Chinland Cozah ralkap CNA le CDFs nih May 22 ah an khamh khawh hna, tiah theih a si.
Thihhlanlo thongthlak ding in dan an tat mi CDM sayama Vung Hoih Kim, kum 7 thong thlak ding in dan an tat mi sayama Vung Hoih Kim i hringtu a pa le Phaitu khuami pa pakhat hi an khamh mi hna cu an si.
Tualchungmi pakhat nih, “An khamh mi hna lak ah CDF sayama le a pa zong an i tel. Cun, Phaitu khuami pa pakhat zong aa tel. Pathum an si. Kahdohnak lio ah khan SAC ralkap nih palik sakhaan in Cyclone Shelter ah an kalpi hna. Cuka hmun cun an khamh khawh hna,” tiah RFA ah a chim.
CDF sayama Vung Hoih Kim le a pa hi atu kum February 24 ah khan SAC nih an inn ah an tlaih hna i, March 13 ah khan thongthlak ding in dan an tat mi hna an si.
Tonzaang khuachung i SAC palik sakhaan, ralkap sakhaan, Cyclone Shelter le zung vialte cu Chinland Cozah ralkap nih an laak dih cang hna, tiah RFA nih a ṭial.
Tonzaang khua laak kahdohnak ah Chinland Cozah ralkap lei in meithal zun 50 leng le tangka sing thong 3 leng zong an laak, tiah theih a si.
