May 15 in aa thawk mi Tonzaang khua laak kahdohnak ah Chinland cozah ralkap CNA le CDFs hna nih meithal zun 50 leng le SAC tangka sing thong 3 leng an laak, tiah theih a si.
Chinland cozah ralkap nih May 19 ah Cikha khua an laak i, Tonzaang khua zong May 21 kan laak tiah CNF/CNA chimnak nawlngei Salai Htet Ni nih media hna sin ah a chim.
Salai Htet Ni nih, “Tonzaang khuachung SAC ralkap hmunkharnak pawl kan laak dih cang. SAC meithal zun 50 leng zong kan laak. Asinain, khualeng ah a zaam mi SAC ralkap pawl cu kan ralkap nih an dawi hna i khualeng ah i kahnak a um pah rih. Cucahcun, Tonzaang in SAC an thiang hrimhrim ti awk a ttha rih lo,” tiah a chim.
May 22 ah SAC ralkap nih helicopter 4 in Tonzaang ah ralkap thazaang a chap i, Chinland cozah ralkap he chunnitlak kahdohnak a um tthan.
SAC ralkap nih Chinland cozah ralkap pawl cu vanlawng in voi tampi a kah hna caah Tonzaang khuachung sang pahnih ah inn a kaang mi zong an um, tiah Tonzaang mizapi ukhruaitu bu nih a thanh.
Tonzaang khua kahdohnak ruang ah Tonzaang khuami a thong in an zaam i, nizaan May 22 zong ah khan hliamhma a pumi ralzaam pa pakhat cu sii-ai tlopbulnak a um lo ruang ah a nunnak a liam.
Tonzaang khuachung ah nizaan May 22 zaan sml. 11 hrawng tiang kahdohnak thawng a thang i, nihin May 23 belte ah kap hnih kahdohnak a um le um lo fiang in theih a si lo.
Tonzaang kahdohnak ah hin Chinland cozah ralkap lei in minung 2 nih an nunnak an pek i, SAC ralkap le ZRA lei in minung 21 an thi, tiah CNA he naihniam minung hna nih online ah an tarmi in theih a si.
