Shan ramkulh Chaklei, Namtu khua cu tu zing suimilaam 1:30 ah TNLA nih a laak khawh i Howitzer miakpi tel in raal hriamnam kuanzen tampi an laak khawh tiah PSLF/TNLA nih a thanh.
Namtu khua SAC ralkap camp pawl cu PSLF/TNLA nih December 25 thawk in an chim hna i, a ni linak December 28 ah Namtu khua pumpi ning in an laak khawh. SAC LIB-324 battalion TOC umnak bo tel in Mansan SAC ralkap camp, Pan Thapyay Camp, Naungsai Outpost, Palek Sakhan le SAC Zung dihlak an laak khawh tiah theih a si.
Kahdohnak ah SAC ralkap cheukhat an zaam caah TNLA ralkap nih an kawl hna i raallam sialnak an tuah cuahmah tiah an langhter.
Kahdohnak ni li chung ah SAC nih vanlawng in voi 61 a kah hna, bomb 218 a thlak i miakpi in Namtu khuachung voi 93 nak tlawm lo a kah tiah an tial. Cun, SAC nih Namtu khua ah Mi-17 helicopter in voi hnih tiang ralkap le hriamnam kuanzen a rak chiah hna tiah TNLA nih a langhter.
SAC nih kahdohnak chung ah khuami umnak lei tinhchih in a kah hna caah tualchung mi pahnih an thi, pariat hma an pu, biaknak inn tel in inn 7 a rawk i inn khat a kaang tiah an langhter.
Kahdohnak ah TNLA nih Howitzer miakpi tel in SAC hriamnam kuanzen le thilri tampi an laak khawh tiah theih a si.
Namtu khua cu vawlei tang kokek thil man sung chuahnak khua tiah a min a thang mi a si i, SAC ralhraang North Eastern Regional Military Command hmunpi a umnak Lashio khua he aa naih bik mi khuapi pakhat a si.
Nihin December 28 tiang ah Ta’ang ralkap PSLF/TNLA nih Namhsan, Namhkam, Menton le Monglon ti in khuapi pali an laak cang i Namtu khua hi a panganak an laak mi khuapi a si tiah kan theih.
Photo: PSLF/TNLA
