TNLA nih Lashio peng, SAC kut tang Jayan Pyithusit camp an laak; hriamnam phun tling zun 80 deng an laak

Shan ramkulh Chaklei, Lashio peng ah a um mi SAC kut tang Jayan Pyithusit camp cu Ta’ang National Liberation Army (TNLA) nih nihin, November 4 ah an laak i pyithusit 38 a nung in an tlaih hna, hriamnam phun tling 80 deng le kuanzen tamp an laak tiah TNLA nih a thanh.

Jayan Pyithusit camp cu SAC nih kuanzen le riahcaw i chanhnak ah an hman mi a si i, SAC ca riahcaw le kuanzen chanhnak rian tuan lo ding in ralrin pek an si ko nain an duh lo caah kan laak mi a si tiah an langhter.

Camp an laaknak ah Pyithusit 38 a nung in an tlaih hna. Camp lutlai a si mi major rank pahnih, captain pakhat le sii lei ralbawi pakhat an hren hna i a dang 34 cu an thlah than hna tiah an tial.

Cu camp ah cun hriamnam phun tling zun 78, zenthong kuang 43, hriamnam kuanzen hna le ralkap thilri tampi an laak pin ah rithaisii bawm 39 zong an laak tiah theih a si.

TNLA nih Operation 1027 ni kuanak ni, November 4 ah Momeik le Lashio peng chung ah SAC ralkap camp pali kan laak khawh tiah an thanh.

Photo: TNLA (SAC kut tang Jayang Pyithusit Camp ah laak mi hriamnam an si.)