Tluangram Sacek le Sangpichung khua an i fonh cang tiah Tluangram khua an i fonhnak ah a tawlrel tu Pu Ral Dun sin in June 22 ah kan theih.
Pu Ral Dun Nih, “Khua pakhat le pakhat kan i then mi nih hin thanchonak le dawtnak lei ah kan tum chuk ngai. Zei ruang ah ti ah cun kan rampi zong nih thancho aa timh ca ah kan khua lei thancho nakding a herh ve. Kan khua than cho nakding ca tangka hal tik zong ah minung tlawm tein hal nak in minung tam deuh nih hal ah cun kan tlamtling deuh lai tiah kan ruah ca ah kum 2018 kum ah fonh nakding timhtuahnak kan rak ngei. Khua hnih ning in kan lemsuai hna i 2019 December thla ah an i fonh ding in biachah a si,” tiah The Hakha Post ah a chim.
“Fonhnak ding ca ah ramdang um Tluangram khua unau pawl nih tangka an thawh cio i a dihlak sing 1000 a chuak. Chungkhar pakhat nih tangka sing 40 cio an thawh. Atu tiang kan dih mi hi sing 900 a si cang.Sangpichung hi inn 62 le Sacek hi inn 26 an si. An i fonh dih hnu ah an dihlak inn 93 hrawng an si. Sangpichung ah an i fonh. 2006 lio ah khan an rak i then i fonhnak khua kan khan kum 2 hnu ah kan i fonh. Kum 14 chung an rak i then. An dihlak in an i fonh dih caan hi 2020 January thla ah khan an i fonh dih. Tluangram hi aho hmanh mi kan um lo mah le mah lawng te kan si. An i fonh hnu in khua ka va tlun zong ah aa fonh kaa mi zong an lo lo luangrual tein rian zong an tuanti hna. Ka hmuh hna ah keimah zong kaa lawm. Hmailei zong ah kan i fonh hnu in cun hawi kan tluk lo zong ah thanchonak lei kan panh ko lai,” tiah a chimchap.
“Khua pakhat le pakhat kan i then tik ah hin thanchonak pakhat hmanh a um kho ti lo. Atu kan ram hi thanchonak lei a panh tik ah policy ning in a kal. Khua pakhat le pakhat kan i then tik ah mi tlawm tete in kan um mi hi thanchonak ah a kan dawn khantu taktak a si. Cucaah a ho kan si zong ah i fonh khawhnak thinlung hi ngei kho cio hna usih law kan khua le kan ram ca ah thanchonak lei ah hin i zuam cio hna usih ti mi hi ca reltu nan dihlak sin zong ah chim ka duh,”tiah Pu Ral Dun nih a chimchih.
Tluangram khua hi A le B ti in an um. Tluangram B ah hin Sacek le Sangpichung tiah an i then i 2020 January thla ah lungrual tein an i fonh cang. Tluangram A hi Vawng tu khua Pu Ceu Ling nih a tlak mi a si. Tluagram B hi Vawngtu khua Pu Chum Mang nih a tlak mi a si, tiah kan theih.
a tanglei ah tling tein rak ngaih khawh a si.
