Thantlang peng, Tlangrua A le Tlangrua B khua leikuang ngei hna cu an kumvui a thatlo ruang ah hmai kum eidin kong ah an lungre a thei tiah November 12 ah Tlangrua B khuabawi sin in theih a si.
“Kan hnu July le August thla ahkhan leikuang facang ah antam hnah i a um tawn mi laangci bantuk khi an chuak. Ti kan theh hna ah tilak ah an tla nain a hnu ah facang ah an kai than. Sii zong kan kah hna nain an lo kho lo. An umnak facang kung cu an nak i an theifang a tha lo. Cu hlan a vui tawn mi nakin zatceo a zor mi an um i, thumchuah khat a zor mi zong kan um. Laak awk a ngei lomi zong kan um. Cuti kan si caah hmai kum thaithawh zaanriah ei ding kong kan ruah ah kan lungre a thei ko”, tiah Tlangrua B khuabawi Pu Hrang Awi nih The Hakha Post ah a chim.
Leikuang a ngei ve mi Pu Steven nih “Facang rai nih a tlaak bak inThantlang peng Cinthlaknak zung ah ca kan tial. A zoh zong an kan zohpiak i sii kah ding zong an kan chimh. Asinain an tha hlei lo. Bawmh halnak ca zong kan tial i Thantlang peng uknak zung sin in Tlangrua B facang tun 194, Tlangrua A facang tun 80 an kan bawmh i kan i lawm tuk”, tiah The Hakha Post ah a chim.
Tlangrua A le Tlangrua B khua ah inn 170 hrawng an um. Cu chung ah leikuang a ngei mi hi inn 70 hrawng an si, tiah theih a si.
