Nihin July 3, Hakha le Thantlang kar, Tita hrawng ah kahdohnak faakpi a chuak i Chin ralkap pahnih nih ram le miphun ca ah an nunnak an pek tiah kan theih.
Ram ca ah a nunnak a pek mi hna cu CDF-Thantlang Commando in Salai Tawk Hlei Thang le CDF-Zophei in Salai Bawi Lian Thang an si tiah kan theih.
“Nizan tihni hrawng khan SAC lei nih ralkap thazaang an rak i chap. Tu zing kha ralhraang nih vanlawng zong an hman. Lam nai tete in an i kap i kanmah lei in ralkap pahnih nih ram ca ah an nunnak an pek. Ralhraang lei zong a thi mi le hmapu tampi an um lai nain zeizat set an thi ti mi kan thei kho rih lo,” tiah CDF-Zophei in tuanvo ngeitu nih THP ah a chim.
SAC ralhraang nih vanlawng le miakpi i bochan in Hakha le Thantlang kar ah Chin ralkap an nam hna i kahdohnak faakpi a um lio a si. A luan cia May thla zong ah Timit le Lungkhar hrawng ah kahdohnak faakpi in a chuak i kap hnih in a thi mi le hma pu tampi an rak um.
Tutan ah thazaang i chap in vanlawng le miakpi he Chin ralkap a rak namtu SAC ralhraang pawl cu CNA, CDF-Hakha, CDF-Thantlang le CDF-Zophei nih an kham cuahmah hna tiah CDF-Zophei tuanvo ngeitu pakhat sin in kan theih.
