2023 April 26 zaanlei sang Timit um ralhraang le Chinland ralkap phu CNA kar lak kahdohnak ah CNA le CDF phu komh nih SAC hmun an khuarnak tlang sang bik cu an chuh khawh hna i hriamnam an laak mi zong a tam tiah theih a si.
Hi kahdohnak kong ah, “Zaanlei suimilaam 4:18 hrawng ah kan va kah hna. Sau ngai te kan i kap. Pathian thawng in kan den khawh tuk hna. Cun, Hakha um ralhraang zong nih hriam ngan in kah a bawmh tuk ko hna nain an umnak cun hnu ah an kir. Kanmah lei in kan naupa pakhat nunnak a liam ve,” tiah min langhter lo pakhat nih THP ah a chim.
Hakha SAC ralhraang pawl nih hriamnam ngan i zaankhuadei kah an bawmh hna pin ah vanlawng nih voi li bomb a rak thlak hna tiah kan theih.
Hi kahdohnak ah Chinland ralkap phu lei in CNA ralkap Salai John Smith nih ram le miphun ca ah a nunnak a pek i, CNA ralkap pahnih le CDF-Hakah ralkap pahnih hma an pu tiah theih a si. Chin ralkap nih ralhraang hmun an khuarnak hmun thum chung ah tlang sang bik tel in hmun hnih an chuh khawh than hna tiah theih a si.
Cu kahdohnak ahcun CNA, CDF-Zophei, CDF-Hakha le CDF-Thantlang hna i fonh in SAC ralhraang pawl an luh hnawh mi hna a si i ralhraang lei a thi mi le hriamnam lak zat tu cu tuanvo ngeitu phu hna nih phungning in thanhnak a um rih lo.
