Tilim Opreation (4) min in Chinland Cozah ralkap nih a kalpimi Thantlang khuachung le Hakha-Thantlang karlak kahdohnak ah SAC ralkap a thimi ruak 25, a nung in tlaihmi 10 leng le hriamnam 30 leng kan laak, tiah CNF/CNA chimnak nawlngei Salai Htet Ni nih a chim.
Chinland Cozah ralkap nih July 22 in Tilim Opreation (4) an thawk i Hakha le Thantlang karlak ah a ummi SAC ralkap sakhaan hna le Thantlang khualu lei ah a ummi Kha La Ya (269) sakhaanpi cu an laak khawh.
“Hi kahdohnak caan chung ah hin SAC ralkap a thimi ruak 25 hrawng kan char. Cun SAC ralkap hliamhma pu minung 50 hrawng Hakha sizung ah an phan. An nung in kan tlaihmi hna hi dikthlir cun ka chim kho lo nain minung 10 nak tlawm lo an si lai,” tiah MFP thawngzamhnak ah Salai Htet Ni nih a chim.
Nihin ni tiang ah SAC ralkap hriamnam 30 hrawng, Kha La Ya (269) sakhaan ah meithal kuan tampi kan laak, tiah a chim chap.
Tilim Opreation (4) an thawk ni in nihin ni tiang ah Chinland Cozah ralkap lei zong in ralkap 10 hrawng nih ram le miphun ca ah an nunnak an pek, tiah Salai Htet Ni nih a chim.
