Thantlang Peng, Tikir le Hlamphei khua ah Cozah lei nih direct in pengthen sii-inn (Station Hospital) an pek mi hna hi upadi ning in zoh ahcun report tuah khawh an si tiah 2020 kum Myanmar ram party tling democracy thimnak ah Thantlang Peng Amyotha Hluttaw No.10 in aa zuam ding Pu Siang Lian Hmung sin in thawng kan theih.
“Station Hospital (Taih-ne) sii-inn hi upadi nih a langhter mi cu direct in pek a ngah lomi a si. Station Hospital ngahnak ding ah HA timi zung a um hmasa a herh. Thantlang Peng ah HA zung timi hi Tlangkhua, Farrawn, Salen le Ngaphaipi lawng ah a um. Hi hna hmanh station hospital pek loin HA zung a um lonak Pu Henry Van Thio khua Tikir le Pi Ni Sui Lian vapa i khua Hlamphei ah station hospital direct in an pek mi hi cu HA zung a ngei mi khua hna ca ah aa dawh lo ngai. Direct in an pek ca ah, eihmuar upadi ning in taza cuai khawh an si. Hi kong hi hlan ngai in kan theih cang nain zei kan chimh lo,” tiah Pu Siang Lian Hmung nih The Hakha Post ah a chim.
Pu Siang Lian Hmung hi 2020 kum Myanmar ram party tling democracy thimnak ah USDP party in Thantlang Peng, Amyotha Hluttaw No.10 ah aa zuam ding a si.
Cun, hi a chim mi kong he pehtlai in Chin Ramkulh Cozah lei chimphuannak nawl ngeitu Minister Pu Soe Htet nih, “Station Hospital pek timi hi mah duh in pek khawh a si lo. Tha tein thim hnu ah pek an si. Cun, atu bantuk in khuate cheukhat ah station hospital tuahpiak kan si hmanh hi kan i lawmh deuh ding a si. Ram a kheel mi minung taktak a si lo zia a lang ngai,” tiah The Hakha Post ah a chim.
Thantlang Peng chung ah station hospital hi, Tikir, Hnaring, Hmawngtlang le Hlamphei ah a um tiah Ngandamnak Zung in theih a si.
Ramkulh Ngandamnak Zung Lutlai Pu Ning Houng nih, “Station Hospital, direct in pek ruang ah report i tuah kho ti pawl hi cu ka thei bal lo. A herh ning in pek mi a si ko lai ti ka zumh. Pek bak lo ding timi upadi ah a um lo. Zung pakhat kal ning ahcun a dot dot tein kal a si ko,” tiah The Hakha Post ah a chim.
