Thantlang Peng Tikir khua ah Bangladesh ram lei in rak lut mi chungkhar 2, milu 11 cu March zarh khatnak ah an phan than, tiah March 16 ah kan theih.
“A hung phan mi hi Bawm miphun an si ve ko. Annih tu hi cu Daw Khin Kyi Foundation nih inn 50 an sak mi ah kan umter hna. Cun, anmah inn 2 lawng si loin Paletwa lei in a rak phan mi lak ah a kekiak mi pakhat zong Daw Khin Kyi Foundation sak mi inn ah kan umter ve. Tirawl le eidin kong tu cu kanmah khuami nih a si khawh chung in kan tawlrel ko hna i cun, tuan deuh ah a rak phan mi hna Cozah bawmhnak zong kan thenhphawt ve ko hna,” tiah Tikir Khuabawi Pu Lian Thang nih The Hakha Post ah a chim.
Paletwa in Tikir a phan mi hi inn 21, minung 101 an si i atu hi inn 2 le minung 11 an i chap than. Hi Bawm bawmhnak hi tangka fang in sing 1000 hrawng a si lai, tiah Minister Pu Soe Htet nih 2019 November 22, The Hakha Post ah a rak chim bal.
