Paletwa Peng, Miza khua in Thantlang Peng, Tikir khua ah a peem mi hna cu Chin Ramkulh Cozah nih bawmhnak tete a pek hna, tiah kan theih.
Miza khua in Tikir khua ah a rak peem mi hna hi chungkhar 12 an si i, minung 61 an si. 2020 March 2 ah Tikir khua an phan. Tikir khuami nih vok an thah i lunglawm tein an don hna, tiah kan theih.
“2020 April 1 ah Thantlang khua ah, bawmhnak peknak an tuah i, Chin Ramkulh Cozah Chimphuannak Nawlngeitu Sipin Minister Pu Soe Htet, Ramkulh Kokek Ral Zohkhenhnak Zung lutlai U Kyaw Soe Win, Penguk Zung lei tuanvo ngeitu hna le Zungkip tuanvo ngeitu hna nih an telpi hna. Ralzaam pawl ngandamnaklei cheknak zong an tuah. Minister Pu Soe Htet nih ralzaam hna thazaang peknak bia zong a chim. Cun, ralzaam chungkhar 12, minung 61 ca ah, thilri phun 12, tangka in Ks. 1,827,000, facang tun 19, chiti cuai 12, cite cuai 12, kalape pi 12, tangka in Ks. 643,000 man a si. Chungkhar pakhat ah changreu bawm 3 cio, Hnaring khuabawi, Thantlang No.1/2 khuabawi le khuami hna nih tithiang bu 100, changreu bawm 100 le mami pha 2, Ngandamnak Zung nih datsa bawm 30, RC Khirhfabu nih tangka Ks. 50,000, Lautu Association Baptist Church nih tangka Ks. 100,000 tibantuk bawmhnak an pek,” hna tiah Thantlang Peng Thawngthanhnak Zung in kan theih.
Hi kong ah Tikir khuabawi Pu Lian Thang nih, “Atu a rak phan mi ralzaam hna hi, lunglawm tein kan don ko hna. An um nakding inn hi, Daw Khin Kyi Foundation nih a sak mi inn ah a si lai. Chungkhar 12 in mee kan zuhter hna lai i, anmahle an poh mi inn cio ah an um lai. Khuami leikap in cun ramchung ramleng kan i bawm i, an herh ding eidin, puan le belkheng tibantuk zong kan timhlamhpiak ko hna. Asinain, kan har ngaingai mah hlan minung 130 dengmang thla 6 chung kan cawm cang hna i, atu vun zohkhenh than ding hi a fawi bak lo. Mah hnu zong ah ra than ding an um tiah kan theih i, hihi cu khualei kan sining i zoh hmasa kan herh. A ruang cu, NGOs siseh, pumpak in siseh, Ramkulh Cozah nih an kan bawmh lo ca ah, kanmah khua lawng zohkhenh ding a fawi bak lo,” tiah The Hakha Post a chim.
AA hriamtlai le Myanmar ram ralkap kahdohnak ruang ah Paletwa Peng in Tikir khua ah ralzaam an peem hi, atu in a voi 3nak a si cang i, a dihlak ah minung 200 deng an si cang, tiah kan theih.
