Thongtla 4,893 luatnak ka pek hna tiah ralkap council SAC nih nihin Kawl kum thar, April 17 ah a thanh i cu chung ah cun ramkheel thongtla tlawm telawng an i tel tiah theih a si.
“SAC nih luatnak pek mi chung ah ramkheel thongtla tlawm tuk lawng an i tel i, thonginn cheukhat ah cun ramkheel thongtla luatnak pek mi an um lo…,” tiah Political Prisoners Network – Myanmar (PPNM) nih cun a langhter.
Luatnak pek mi hna nih sual an tuah ṭhan ahcun an in ding mi hremnak le atu i a taang rih mi thong tlak ding caan fonh in hremnak pek an si lai, ti mi rikhiah he luatnak pek an si. Thonginn in chuah mi chung ah ramkheel thongtla zeizat an i tel lai ti bel cu hngalh a si rih lo.
A luan cia caan i SAC nih thongtla a rak chuah hna tik zong ah ramkheel thongtla tlawm telawng an rak i tel tawn.
Ralkap nih nawlngeihnak chuh hnu 2021 February ni 1 in 2025 April 11 tiang ah tlaih a tong mi 29,030 an si i cu chung ah 22,197 cu thong thlak lio mi an si tiah, thongtla bawmchantu bu AAPP thawngthanh mi ah hmuh a si.
Photo: Social media
