2023 December 18 lio in kah hram an rak thawk cang mi Rakhine ramkulh, Ramree (Rambye) khua cu nizan March 11, chun hnu sml. 1:30 hrawng ah laak a si cang tiah Chaklei Unau Thum Phu nih a thanh.
“Ramree khua ah a taang mi SAC ralkap dihlak pakhat hmanh taang lo in kan thianh khawh hna caah Ramree khua cu Rakhine ralkap AA nih a ningpi in a laak mi khua a si cang,” tiah AA nih a thanh.
Ramree khuami pawl nih khua ah kir colh rih lo ding zong an thanh i, kahdoh caan chung ah SAC ralkap nih an tunh mi bomb rap pawl thianh an hauh rih caah a si tiah an langhter.
AA nih Chinram Paletwa, Rakhine ram Chaklei khuapi a si mi Kyauktaw, Mrauk-U, Minbya, Pauktaw, Myebon, Ponnakyun le Rakhine ramkulh Thlanglei ah a um mi Ramree khuapi cu a laak cang hna.
Photo: Ramree khua Google Earth hmanthlak
