Hakha, Khuathar khuasa kum 4 ngakchia nute a sualpi tu Myat Thu Aung tiah auh mi Pa Cung Bik cu bia an ceih thla thum hnu ah kum 1o thong tla ding in, Hakha Pengkomh, Biaceih Zung nih 2020 October 26 ah bia an chahpiak cang tiah thawng kan theih.
Hi kong he pehtlai in tlaihhrem a tong mi nute i hringtu a nu nih, “Atu bantuk in kan ton hi a liamcia July 27 zaan lei ahkhan a si. Zung kan chuah hi, thaizing in thla thum a tling lai. Hi bantuk tiang hi kanmah leikap nih kan i timh mi le kan i ruahmi zong a si lo. Anmah lei nih a dihdongh tiang ngaihthiam zong kan hal hna sehlaw cu, a dai ding khi a si ko,” tiah The Hakha Post ah a chim.
Sualpi a tong mi nute hi a sualpi lio ah kum 4 a tling taktak rih lo, thla khat aa duh tiah theih a si.
Cun, hi kong ah tawlreltu a si mi CHRO lei in Mai Thin Yu Mon nih, “Hi bantuk kong ahhin dik le fel tein bia an chah nakding hi kan duh mi cu a si. Hi bantuk in kan duh mi zong hi sualpi tu lei kan huatnak le kan rem lonak a si lo. Dik le fel in biachahnak tuah lo a si cun, hmailei zong ah a chuak pah ding dirhmun khi a si. Biaceih zung lei zong nih anmah le phung ning tein a kal mi a si. Thla thum chung ah aa lim kho mi zong hi rian ngeitu pawl an i biatak mi le an cawlcangh ning a tha i kan i lawm taktak,” tiah a chim.
Hi kong ah Hakha mino, CHRO, Social Affairs Zung lei hna nih dirpi le tawlrel piak a si. Case an tuahpiak mi hi tlaihrem timh case pohma 376-511 in a si tiah kan theih.
