Myanmar Cozah ralkap le Rakhine ralkap AA kahdohnak a fah chin lengmang ca ah 2020 January in June thla tiang ah khuami a thi mi mnung 40 an si tiah Chin IDP Support Committee nih 2020 June 9 ah a langhter.
Paletwa Peng chung ah 2020 January thla thok in AA le Cozah ralkap pehtlai in an i kah ca ah June thla tiang ah minung 40 an thi. Hi minung 40 chung ah a thi mi a tam cem hi Nang La Vum khua an si tiah Chin IDP Support Committee Secretary Ko Kyaw Aung sin in kan theih.
“2020 January in June thla tiang ah Paletwa Peng chung lawng ah a thi mi hi minung 40 an si. Minung 40 chung ah bomb puahnak in a thi mi an tam cem. A thi mi hna hi mi zei kut indah an thi ti kan thei kho lo. A cheu cu an thah hna i a ruak in kan char mi hna zong an um ve,” tiah Ko Kyaw Aung nih The Hakha Post ah a chim.
2020 March thla thok ahkhan Myanmar Cozah ralkap nih, Mitsawa khua, Wetma khua le Mitsawa khua hna cu raltuk vanlong in an kah hna i khuami minung 29, Paletwa khuapi chung le Puivung khua in minung 8 bomb nih a puah hnawh hna i an nunnak a liam tiah thawng kan theih.
Paletwa Peng ah kahdohnak a chuah peng ca ah khuami hna lungreithei in an um lawng si loin lamsul lei phih dih a si ca ah ei din lei ah siseh, a dangdang lei ah siseh harnak an tong i lungrethei in an um tiah Paletwa Peng Mee hmun in Amyotha Hluttaw Palai Pu Hoi Tin sin in kan theih.
“Atu thil sining in cun a thi mi hi cu zat kha zat tiah fiang lak in chim a har ngai. Vanlawng awthawng theih poh ah tar le ngakchia cu an tli an zaam, an i thup. Meithal puah thawng le bomb puah thawng an theih a si cun khawika indah kuanfang a rat lai i an kan khen lai ti lawng te an ruat. Hihi khuami dihlak an lungre a thei cemmi a si,” tiah MP Pu Hoi Tin nh The Hakha Post ah a chim.
Rakhine ram chung zong ah 2018 kum dongh lai in 2020 kum June thla tiang ah a thi mi minung 250 leng an si i, minung 550 hliam an tuar, minung 500 tlaih khih an tong. Rakhine ram chung ah Chinmi a thi mi minung 20 hrawng an si cang tiah theih a si.
