Hakha khuachung ah thil man a kai mi le ningcang loin thil a zuar mi cu Eidin lei Zohfelnak Zung nih dan an tat hna lai, tiah Hakha Penguk Zung lutlai U Myint Oo nih a chim.
“Eidin lei Zohfelnak Zung nih, thil man an kai maw kai lo, ningcang tein thil an zuar maw zuar lo ti hi zarh khat voi khat zohfelnak an tuah. COVID-19 zawtnak i runvennak kong he pehtlai in mask (hmurhuh), handgel (kuttawlnak) tibantuk zong man kai in zuar lo ding tiah Myanmar rampi Cozah nih a thanh cang. Cu tik ah, thil man an kai a si ahcun, thil cawtu hna nih, nan cawknak voucher he Eidin lei Zohfelnak Zung ah thanh hna, tiah nawl kan duh ko hna. An thanh hna ahcun, dan an tat ko hna lai. Tette um lo in thil man an kai ti sawhsawh cun, dantat awk an tha lo. Thil man an kai tiah nan theih hna a si ahcun voucher la ulaw Eidin lei Zohfelnak Zung nih dan an tat ko hna lai. Atu tiang ah Hakha ahcun thawng a thanh mi an um rih lo. Hmun dang ahcun thil man an kai tiah thawng a thanh mi zong an um. Hi hun zong ah thil man a kai mi kan theih hna ahcun upadi ning in dan kan tat ko hna lai,” tiah Hakha Penguk Zung lutlai U Myint Oo nih The Hakha Post ah a chim.
Myanmar ramchung ah COVID-19 zawtnak hi a kar lei a panh ca ah, zawtnak i runvennak a si mi mask le handgel zong a man an kai hna. Magwe Ramthen, Kyauk Peng ahcun Mask le handgel man a kai mi pohpoh upadi ning in dan kan tat hna lai, tiah Cozah nih ca a chuah cang
