Chin Ramkulh Tedim peng le Yangon ah COVID-19 zawtnak hrik a ngei mi an hmuh mi kong he pehtlai in Kalay-Hakha, Yangon-Hakha motor lutchuak lam phihkhar a si lo tiah theih a si.
Hi kong he pehtlai in Chin Ramkulh Cozah chimphuannak nawl ngei Minister Pu Soe Htet nih, “Motor lutchuak lam phihkhar le khar lo kong ah Chin Ramkulh cozah lutlai cheukhat i tong in 2020 March 24 ah biaruahnak voi hnih kan ngei.Hi kan biaruahnak ah motor lam hi phihkhar lo ding in biachahnak kan tuah. Aruang cu, motor lam kan phihkhar ahcun dawr ngeitu nih thil an zuar mi facang siseh, a dangdang siseh phung ning loin a man an kaiter tuk sual lai ti kan phang. Asinain, motor luhchuak caan tu hi rikhiah in kan tuah lai. A si khawh ahcun atu bantuk caan ah khual tlawng lo ulaw a tha bik,” tiah The Hakha Post ah a chim.
Motor lutchuak hi phihkhar a um lai lo nain a caan rikhiah in an tuah lai. Cun, ramleng lei in a rak tlung mi ramleng khual tu hi cu tha te le fel tein rian ngeitu hna nih zohkhenh a si lai tiah kan theih.
Cun, “Lam hi phihkhar a um lo, atu zong caan hman an kal ning bantuk tein Bus zong an kal ko. Lam hi phihkhar a si lo ca ah tih ding le phan ding a um lo. Kanmah leikap in hi zawtnak he pehtlai in Gate kip ah kal in mizapi sin ah chimfiannak, chimphuannak zarhfatin kan tuah,” tiah Chin Ramkulh Kuatphurhnak zung lutlai U Saw Myint Lwin nih a chim.
