Thibaw (Hsipaw) khuapi laak kahdohnak ah tlaih mi SAC ralkap chungkhar minung 200 deng kan thlah ṭhan hna tiah PSLF-TNLA nih nihin ah a thanh.
Cu ralkap chungkhar hna cu LIB-503 le LIB-504 battalion chung ah tlaih mi an si i minung 191 an si. TNLA nih LIB-503 cu September 26 ah an rak laak i SAC ralkap chungkhar minung 102 an rak tlaih hna. September 27 ah LIB-504 an laak ṭhan i ralkap chungkhar minung 89 an tlaih hna tiah theih a si.
An tlaih mi hna chung ah ngakchia 77 le nu 87 an i tel tiah an langhter i, khoika lei ah an thlah hna ti belte an langhter lo.
TNLA nih nizan October 13 ah IB-23 SAC ralkap battalion an laakchap cang caah Thibaw khuapi ning in kan kut ah a um cang tiah zapi theihternak an tuah. IB-23 battalion kahdohnak zong ah SAC ralkap chungkhar minung 100 leng an tlaihchap hna tiah theih a si.
Photo: TNLA (SAC ralkap chungkhar minung 200 deng TNLA nih an thlah hna lio)
