COVID-19 zawtnak in mizapi kan i ralrin khawh nakhnga Hakha, Falam khua chung hmun zeimawzat ah kuttawlnak chiah nakding ca ah The Netherlands Sipin nih Loka Alin sin ah Budget a pek tiah kan theih.
Hi kong he pehtlai in Loka Alin Project Manager Pu Kam Thang nih, “Atu kan ram tiang a rak phan cang mi COVID-19 zawtnak ruang ah chikhat te cu mizapi thinphang thla lau in kan um dih cio. Hi zawtnak ruang ah lungretheih tuk ding le tih tuk ding si loin a hlankan tein kan i ralrin ding hi a biapi deuh. Chin Ramkulh Sipin bawmhhalnak in Loka Alin nih Hakha le Falam ah COVID-19 kan i runven khawh nakhnga kuttawlnak kan chiah lai. Hi kuttawlnak kan chiah mi hi mizapi nih i thathnem pi hna usih tiah kan duh. A hlankan tein ralrin kan thiam ding hi a biapi mi a si,” tiah The Hakha Post ah a chim.
The Netherlands Sipin nih Myanmar ram Tanintary ah peng thum, Chin Ramkulh chung ah peng hnih bawmhnak a pek hna. Tanintary chung ah Hta-wai khuapi, Kawhtawng khuapi le Mik khuapi ah bawmhnak a pek hna tiah kan theih.
Cun, “Tawlreltu hi kanmah Loka Alin lei kan si nain a tuantu taktak ding hi cu Hakha peng Sipin an si lai. Hakha ahhin market ah hmun thum, sii-inn ah hmun li le sii-inn lampial Ral Dun Market hmai ah hmun hnih, tiin kan chiah lai. Atu sii-inn lampial ah ti liter 1000 tlum tipung kan chiah lai. Ti lei hi Peng Sipin nih tuanvo an lak lai. Cun, Falam khua chung ahhin KBZ hmai, Shwe ChanDeih Gate hmai, Bazar hmai ah, tiin hmun thum ah kan chiah ve lai. Cun, mizapi kan i ralrin khawhnak hnga ca zong kan tar lai ,” tiah Loka Alin Township Local Governance Officer Salai Lal Tan Pui nih a chim chap.
(By:
