Thantlang peng Thau khua hlun cu cozah nih an sianglai run saknak ca ah tangka sing 540 an bawmh hna nain kan sok mi tlakrawh sak nakding tangka sing 709 pe lo in kanmah theihter lo in Peng Fimcawnnak Zung nih thing inn saknak ca ah nan sok mi tu nan kan pek ti in an khirh hna.
“Kanmah nih kan sok mi cu tlakrawh inn saknak ca ah sing 709 kan sok i an kan pek mi cu kanmah theihter lo, anmah nawl in an rak sok mi thing inn in saknak ca ah ting 540 tu an kan pek. Hi an sok mi hi khuami an kan theihter lo pin ah Thantlang peng MP Dr. Hmuh Thang, Peng Uknaklei Lutlai le Soh Loh Zi Lutlai hna kha theihpinak min an thutter hna i cuti cun an rak sok,” tiah hi kong tuanvo a rak latu Thau (A) Khuabawi hlun Pu Mang Er nih The Hakha Post ah a chim.
“Hi kong he pehtlai in Thantlang Peng Fimcawnnak Zung ah Myone hmu he kanmah khuami theih lo in nanmah zung nih nan rak sok mi tu nan kan pek tiah kan i al lio ah an Cazipi nih ‘an sayakyi aa thial cang mi min in kan rak sok tak ko,’ tiah an sok ningcang kha a hun chimh,” tiah Pu Mang Er nih a chim.
“Khuami nih bawmhnak kan cohlan lo ca ah Ramkulh Fimcawnnak Zung lei in tuanvo ngei pathum an hun thlah hna i ‘thing inn sak nakding hi cohlang ko u, a hnu ah private (twephet) in sianginn kan i tlum lo tiin nan sok than te lai, cuti lo cun tutan budget hi phih a si cang i nan hmu kho ti lai lo,’ tiah an rak kan ti nain khuami nih kan duh lo i kan khirh hna,” tiah Pu Mang Er nih a chimchap.
Hi an rak kan nawl hi Khuathar ah a si i, cu lio ah Khayaing hmu le a hawile pawl khua thar i an rat lio a si i, Khayaing hmu nih ‘Ziah thing inn hi cohlang ko u, tiah va nawl hna u, kan in ti tung hna lo, Zephai (B) tlakrawh pek mi tu kha va pe hna u kan in ti ko hna kha ta,’ tiah a ti hna,” tiah a cunglei upa nih a chim.
Tutan ah Thantlang peng sianglai run inn saknak ah Cozah nih khua sarih an bawmh hna i Thau (A) khua lawng hi thing inn ca ah bawmh an si tiah a cunglei upa sin in theih a si. Tutan Thau khua nih an sok mi sianglai run inn cu pe 150×30 in an sok.
