2020 October 17, Thantlang sii-inn ah Pu Bei Vai thihnak kong he pehtlai in Ngaphaite mino hna nih ralrin peknak le lungtlin lonak cathanh an chuah tiah thawng kan theih.
Hi kong he pehtlai in Ngaphaite mino Chairman Van Ni Hmun nih, “Atu bantuk in kan pu a thih hi sii-inn lei riantuantu hna daithlan ruang bik ah a si ko ti khawh a si. Hi bantuk in an daithlan peng rih a si ahcun, mizapi kan ca ah tih a nung ngai mi a si. Hi bantuk tiang a phak than ding hi kan duh lo ca ah kanmah mino lei zong nih ralrin peknak le a thihnak kong he pehtlai in lungtlin lonak kan langhter hi a si,” tiah The Hakha Post ah a chim.
Pu Bei Vai hi 2020 October 12 ah Rilfonghlei zawtnak in i thlop ding ah Thantlang sii-inn ah a phan. 2020 October 17 ni ah hlainak an tuahpiak i, hlainak an tuah ni ahcun a nunnak a liam ve tiah kan theih.
Cun, cathanh an chuah mi kong he pehtlai in Thantlang sii-inn uk Tun Pwar nih, “Cathanh an chuah mi kong he pehtlai in zeihmanh leh thannak ka ngei rih hna lo. Aruang cu ca an tial mi a sullam dang hna a chuak sual lai i, buainak zong chuahpi than a si lai ti ka phaan ca ah zeihmanh chim loin ka um rih,” tiah The Hakha Post ah a chim.
Cathanh an chuah mi chung ah, a nunnak a liam mi Pu Bei Vei hi, ihkhun cung ihter ding in an cawinak ah sii-inn lei riantuan pawl daithlan ruang ah ihkhun in a tla i atu bantuk in a zualhmatnak zong a si. Ihkhun cung a tlakka ah a zualhma ngai i, hlainak tuahpiak ding in siibawi an va auh. Voi khatnak a rat ah siibawi nih zeiti hmanh a ti lo. A zualhmat chinchin ca ah sii sayama te nih an va auh than i siibawi pa cu a rak um ti lo. Hi bantuk in rian an tuan ca ah, upadi an lonh a si tiah aa tel.
