Nizaan September 22 ah a cangmi Thantlang khuachung kahdohnak ah SAC ralkap pawl hmunhma an laaknak inn pakhat cu Chinland Cozah ralkap hna nih an laak khawh i, SAC nih Jet Fighter pahnih in bomb thlaknak zong a tuah, tiah thawng kan theih.
September 22 zinglei in Thantlang khuachung ah kahdohnak a faak i Hakha SAC ralkap nih hriampi in Thantlang lei ah voi 10 leng an kah pin ah Jet Fighter pahnih zong in bomb an rak thlak.
SAC Fighter Jet pahnih nih CB Bank pawng ah voi khat, NLD zung pawng ah voi 2 le Thantlang Baptist Church pawng ah voi khat tiin, voi 4 bomb an thlak.
Nizaan September 22 Thantlang kahdohnak ah CB Bank hmai ah a ummi SAC ralkap hmunkhuarnak inn pakhat cu Chinland Cozah ralkap nih an laak khawh, tiah theih a si.
