Thantlang khua chung i a um mi SAC ralhraang battalion-269 ralkap pahnih cu meithal zun hnih le kuanzen tampi he CDF-Hakha sin ah CDM an rak tuah tiah CDF-Hakha nih nihin February 20 zaan ah an thanh.
“Hramhram in uknak a lam mi SAC ralkap riantuannak kan duh lo, mipi dohthlennak (Pau Dohthlennak) ah kan i tel ve lai,” ti in CDM an rak tuah tiah an langhter.
CDF-Hakha sin ah a rak i fon mi SAC ralkap pahnih nih MA3 meithal zun khat, MA1 meithal zun khat, zenthong 674, Magazine 9, kut cheh bomb 4, 60MM bomb thei 3 le a dang thilri hna he CDM an rak tuah tiah theih a si.
Hi bantuk in CDF-Hakha sin ah CDM in dohthlennak a tuah mi hna cu lunglawm tein kan cohlan hna i minung pakhat ah tangka Kyats sing 30 veve kan pek hna leng ah himnak hmun an phak tiang tuanvo kan laak hna, ti zong an langhter.
