Thantlang Peng Myanmar le India ramri kam um khuate thakbare a man a tha peng rih, tiah thakbare ciin in paw aa cawm mi sin in thawng kan theih.
“Kannih khua cu zuar kan thawkka te lawng a si rih i atu lio te hi a zuar caan te a si. A tlangpi in tu kum hi kan kumvui a tha i a man zong kum dang nakin a that cem kum a si,” tiah Zaangtlang COTR Pastor Rev. Chan Lal nih The Hakha Post ah a chim.
Thantlang Peng Myanmar le India ramri kam um khuate tampi chung in thakbare a ciing mi khua chung in an kumvui a tha mi khua hna cu; Zaangtlang, Dawn, Ruabuk, Bungkhua, Saikah, Sialam, Bungtlang, Vanzang le Tlangpi hna an si, tiah kan theih.
Thakbare a cawtu tam bik le an zuarnak hmun tam bik cu Kala miphun le Kala ram ah a si. Myanmar ram Tamu khuami zong nih an cawk ve i Kala ram lei ah an zuar chin ve. Thakbare an zuar ningcang cu; Kg pakhat ah India Rs. 250 a si. Pung khat ah Myanmar tangka in Ks. 15,000 in 20,000 kar ah zuar a si.
“Tam deuh nih cun Tawlreba hi Chinmi pawcawnnak ca ah a tha bik a si lai an ti ko nain nihin tiang sining ah cun thakbare nih a tei deuh rih ko. Thakbare zuar mi man in khuapi lei ah dawr a tuah kho cang mi le inn a sa kho cang mi an tlawm ti lo. Inn khat nih kum khat ah pung 100 in 300 karlak hi an hmuh i a tangka in sing 20 in 30 karlak hmuh a si,” tiah Rev. Chan Lal nih a chimchap.
Thantlang Peng Zaangtlang le Dawn hi ramri Tio tiva kam ah thakbare a ciing hmasa mi khua an si i kum 30 leng an ciinnak a si cang. Chin Ramkulh Khualipi Hakha ah thakbare cu pawng khat ah tangka Ks. 500 in an zuar.
