Chin National League for Democracy (CNLD) Central Executive Committee (CEC) nih Palai cuh a duh mi June 27 tiang a onh rih, Palai zong fehter an si rih lo nain Social Media ah fehter bantuk in an min le an dirhmun (position) tiang an lang, hi kong hi felfai deuh in kan tawlrel ko lai, tiah CNLD Chairman Pu David Ngai Sak nih June 23 ah a chim.
Hi a lang mi hna hi, Pyithu Palai ah Salai Martin Van Bawi Lian, Ramkulh mee hmun No.1 ah Pu Lal Maung Cung le Ramkulh No. 2 ah Pu Rung Kaw hna an si i Amyotha Palai belte a lawng in Social Media ah an lang pah lengmang i mizapi zong nih theih an si cang.
Hi kong ah CNLD party Chairman Pu David Ngai Sak nih, “Hi kong hi online ahcun kan hmuh lengmang ko. Asinain anmah Thantlang Peng CNLD EC nih a fehter mi cu a si lai lo. Amah belte an konglam hi kan fian dih lo ca ah June 20 ah khan party CEC meeting kan tuah. Kan biachahnak cu Thantlang le Hakha ah Party Chairman Pu Zo Zam le Vice Chairman Pu Awm Yaw kal ding in kan ti hna. Hakha hi cu a buai mi a um lo. Thantlang belte hi zeimaw tete a um pah ca ah tuan ah an va kalhnawh te hna lai. A ngaingai cu, June 27 tiang hi mizeipoh nih Palai cuh a duh ahcun soknak form (sohhlua) lak khawh a si rih. Social Media ah fehter bantuk in an langh mi hi a si tak ko ahcun party kan phung he aa kalh mi a si. Asinain, anmah Thantlang Peng EC nih an fehter mi cu a si lai lo,” tiah The Hakha Post ah a chim.
Hi kong he pehtlai hin Thantlang CNLD party Chairman Pu Lal Maung Cung le Secretary Pu Tum Sang phone kan chawnh hna nain kan pehtlai kho hna lo.
