Thantlang Peng Biaceih Zung nih motorcycle firtu minung pathum cu 2020 June 4 ah kum 2 cio thongthlak ding in bia a chah, tiah tuanvo ngeitu sin in kan theih.
Hi kong he pehtlai in Thantlang Peng Biaceihtu Salai Thawngpi nih, “Thantlang um mi Bawi Hup cu Lahva lo ah motorcycle in a kal i lamkam ah a chiahtak. Tlun aa timh tik ah a motorcycle a hmu ti lo. Kalay Peng, Myauksi Palek sakhaan nih 2020 May 19 ah motorcycle tawh hrawh bu in aa cit mi pathum cu an lunghrinh ca ah an tlaih hna. Bia an hal hna tik ah Thantlang rian an tuannak in an tlun pah ah an fir i an i tlunpi mi a si kha an phuan. Cucaah, Thantlang Peng Palek sin ah an rak kuat hna i taza an cuai hna. An pathum ning in Penal Code caang 379 ning in kum 2 cio thongthlak ding in bia ka chah,” tiah The Hakha Post ah a chim.
Penal Code caang 379 hi kum 3 tiang thongthlak khawh mi a si kong a chimchap. Motorcycle firtu hna hi Mg Nay Zaw Win (kum 31), Mg Zaw Naing Win (kum 22) le Mg Myo Min Zaw (kum 22) an si i Kalay Peng, Innkyun khuami an si, tiah kan theih
